ព្រះពុទ្ធបដិមាអាយុកាល១០០០ឆ្នាំបង្កប់អដ្ឋិធាតុព្រះសង្ឃចិនត្រូវចោរលួច តុលាការចិនបង្គាប់ឲ្យអ្នកទិញប្រគល់មកវិញ

តុលាការប្រជាជនជាន់ខ្ពស់ Fujian ក្នុងខេត្ត Fujian ភាគខាងកើតប្រទេសចិន កាលពីថ្ងៃអង្គារបានចេញសាលក្រមជាសាធារណៈលើសំណុំរឿងសពព្រោះសង្ឃចិនឈ្មោះ Zhanggong Zushi ដែលតម្កល់ទុកក្នុងរូបសំណាកព្រះពុទ្ធដែលមានអាយុ 1,000 ឆ្នាំ។ រូបព្រះពុទ្ធបដិមាដែលមានបង្កប់អដ្ឋិធាតុព្រះសង្ឃចិនបុរាណនេះ ត្រូវបានចោរលួចច្រើនឆ្នាំមកហើយ។

អ្នកជំនាញបាននិយាយថា ករណីនេះក៏បំភ្លឺផ្លូវថ្មីមួយសម្រាប់ការយកវត្ថុបុរាណវប្បធម៌ចិនដែលបានបាត់បង់ទៅក្រៅប្រទេសវិញតាមមធ្យោបាយផ្លូវច្បាប់ ដែលនឹងមានអត្ថន័យនៅក្នុងករណីស្រដៀងគ្នានាពេលអនាគត។ រូបសំណាកព្រះពុទ្ធដើមដំបូងត្រូវបានតម្កល់នៅក្នុងភូមិ Yangchun ក្នុងទីក្រុង Sanming ក្នុងខេត្ត Fujian ប៉ុន្តែត្រូវបានលួចនៅថ្ងៃទី 14 ខែធ្នូ ឆ្នាំ 1995។

អ្នកប្រមូលវត្ថុសិល្បៈជនជាតិហូឡង់ Oscar Van Overeem បានអះអាងថា គាត់បានទិញរូបសំណាកនៅឆ្នាំ 1996 នៅទីក្រុង Amsterdam ប្រទេសហូឡង់ ប៉ុន្តែគាត់មិនបានផ្តល់ភស្តុតាងនៃការជួញដូរនេះទេ។

តុលាការបានជឿថា រូបសំណាកក្នុងពាក្យបណ្ដឹងជាវត្ថុបុរាណវប្បធម៌ដែលលួចនាំចេញដោយខុសច្បាប់។ វាមានទាំងសំណល់មនុស្ស និងសារីរិកធាតុប្រវត្តិសាស្ត្រ ដែលឆ្លុះបញ្ចាំងពីទំនៀមទម្លាប់ប្រពៃណី និងស្លាកស្នាមប្រវត្តិសាស្ត្រនៃតំបន់ Fujian ភាគខាងត្បូង។ តុលាការបាននិយាយថា រូបសំណាកនេះ គឺជាការគោរពបូជាដ៏យូរលង់របស់អ្នកភូមិក្នុងស្រុក ដែលមានអត្ថន័យពិសេសសម្រាប់អ្នកស្រុក។ រូបសំណាកនេះគួរតែប្រគល់ជូនអ្នកភូមិវិញ ។

ករណីនេះអាចជាឯកសារយោងដ៏សំខាន់សម្រាប់ករណីស្រដៀងគ្នានាពេលអនាគត ដោយសារតុលាការបានបង្ហាញពីមូលហេតុដែលរូបសំណាកព្រះពុទ្ធគួរត្រូវបានប្រគល់ជូនអ្នកភូមិចិនវិញ ដោយសារតែហេតុផលគឺ វត្ថុបុរាណនេះវាមានអត្ថន័យដ៏ជ្រាលជ្រៅសម្រាប់អ្នកស្រុកគោរពបូជា ដែលជាវត្ថុវប្បធម៌ប្រវត្តិសាស្ត្រ។ នេះបើយោងតាម លោក Liu Zheng សមាជិកនៃបណ្ឌិត្យសភាវប្បធម៌បុរាណចិនបានប្រាប់ Global Times កាលពីថ្ងៃអង្គារ។

លោក Liu បាននិយាយថា ករណីនេះមានអត្ថន័យក្នុងការស្វែងរកមធ្យោបាយសំខាន់មួយទៀតដើម្បីអនុញ្ញាតឱ្យវត្ថុបុរាណវប្បធម៌នៅក្រៅប្រទេសត្រឡប់ទៅស្រុកកំណើតរបស់ពួកគេវិញតាមរយៈ “មធ្យោបាយស្របច្បាប់”។ ជាការពិតណាស់ កាលពីអតីតកាល យើងបានប្រើការពិគ្រោះយោបល់ការទូត ដែលជាវិធានការសំខាន់មួយផងដែរ ដើម្បីអនុញ្ញាតឱ្យវត្ថុបុរាណវប្បធម៌ចិនដែលបាត់បង់កាន់តែច្រើនត្រឡប់ទៅកាន់ទីតាំងដើមវិញ ប៉ុន្តែនៅតែមានកម្រិតដោយសារហេតុផលផ្សេងៗ នេះបើយោងតាមលោក Liu ។

ប្រទេសចិនបានចូលរួមអនុសញ្ញា UNIDROIT ស្តីពីវត្ថុវប្បធម៌ដែលត្រូវបានលួច ឬនាំចេញដោយខុសច្បាប់ ដើម្បីទប់ស្កាត់ការជួញដូរវត្ថុបុរាណវប្បធម៌ខុសច្បាប់។ យោងតាមលោក Liu បានឱ្យដឹងថា អនុសញ្ញានេះមានប្រយោជន៍ក្នុងការអនុវត្តតាមច្បាប់អន្តរជាតិ និងបទប្បញ្ញត្តិដើម្បីការពារវត្ថុបុរាណវប្បធម៌។

សូមបញ្ចាក់ថា Zhanggong Zushi មានឈ្មោះដើមថា Zhang Qisan គឺជាព្រះសង្ឃនៅក្នុងរាជវង្សសុងរបស់ប្រទេសចិន (960-1279) ។ សាកសពរបស់គាត់ត្រូវបានគេតម្កល់ទុកនៅក្នុងរូបសំណាកព្រះពុទ្ធ ហើយបានតម្កល់នៅក្នុងប្រាសាទ Puzhao ដែលជាកម្មសិទ្ធិរួមគ្នាដោយភូមិ Yangchun និង Dongpu ហើយត្រូវបានអ្នកភូមិគោរពបូជារហូតដល់វាត្រូវបានគេលួចនៅឆ្នាំ 1995 ។ នៅខែមីនា ឆ្នាំ 2015 រូបសំណាកនេះត្រូវបានដាក់តាំងបង្ហាញនៅសារមន្ទីរហុងគ្រីដោយមានការអនុញ្ញាតពី Van Overeem ជិត 20 ឆ្នាំ បន្ទាប់ពីវាត្រូវបានលួច។ Yangchun និងអ្នកភូមិ Dongpu នៅ Fujian ជឿថារូបសំណាកគឺ Zhanggong Zushi ដែលត្រូវបានលួចពីប្រាសាទ Puzhao ប៉ុន្តែលោក Van Overeem បានទទូចថារូបសំណាកនេះមិនមែនជារូបសំណាកតែមួយនោះទេ។

ភាគីទាំងពីរមានការចរចាខ្លះក្នុងអំឡុងពេលនោះ ប៉ុន្តែមិនបានសម្រេច។ យោងតាមទីភ្នាក់ងារព័ត៌មានស៊ីនហួ បានឱ្យដឹងថា គណៈកម្មាធិការភូមិទាំងពីរបានចាប់ផ្តើមដំណើរការតុលាការនៅហ្វូជៀនក្នុងឆ្នាំ 2015 និងនៅក្នុងតុលាការទីក្រុង Amsterdam ក្នុងឆ្នាំ 2016 ។នៅក្នុងខែធ្នូ ឆ្នាំ 2018 តុលាការទីក្រុង Amsterdam បានកាត់ក្តីករណីនេះមិនអាចទទួលយកបាន ដោយនិយាយថាវាមិនច្បាស់ថាតើគណៈកម្មាធិការភូមិរបស់ប្រទេសចិនមានសិទ្ធិក្នុងការទាមទារតាមផ្លូវច្បាប់ឬយ៉ាងណានោះទេ។ នេះបើយោងតាម ស៊ីនហួរ។នៅថ្ងៃទី 4 ខែធ្នូ ឆ្នាំ 2020 តុលាការប្រជាជនកម្រិតមធ្យម Sanming ក្នុងខេត្ត Fujian បានបញ្ជាឱ្យចុងចោទជនជាតិហូឡង់ ប្រគល់រូបសំណាក Zhanggong Zushi ទៅម្ចាស់ដើមវិញ គឺគណៈកម្មាធិការភូមិ Yangchun និង Dongpu ក្នុងរយៈពេល 30 ថ្ងៃបន្ទាប់ពីសាលក្រមចូលជាធរមាន។

បន្ទាប់ពីរូបសំណាកត្រូវបានលួច និងនាំចេញខុសច្បាប់ទៅក្រៅប្រទេស គណៈកម្មាធិការភូមិ Yangchun និង Dongpu មានសិទ្ធិអនុវត្តកម្មសិទ្ធិក្នុងនាមអ្នកភូមិ ដើម្បីអនុវត្តការបន្តឆ្លងដែន និងទាមទារឱ្យអ្នកកាន់កាប់ខុសច្បាប់ប្រគល់វត្ថុបុរាណវប្បធម៌ដ៏មានតម្លៃដែលបានបាត់បង់មកវិញ នេះបើយោងតាមតុលាការប្រជាជនកម្រិតមធ្យម Sanming ៕
ប្រភព៖ Global Time