រដ្ឋបាលខេត្តស្ទឹងត្រែង រៀបចំសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារសម្រាប់អនុវត្ត ឆ្នាំ២០២២ របស់រដ្ឋបាលខេត្តស្ទឹងត្រែង

/KK/ស្ទឹងត្រែង ÷ នាព្រឹកថ្ងៃទី ១៦ ខែមីនា ឆ្នាំ២០២២ រដ្ឋបាលខេត្តស្ទឹងត្រែង រៀបចំសន្និបាតបូកសរុបលទ្ធការងារប្រចាំឆ្នាំ២០២១ និងលើកទិសដៅការងារឆ្នាំ២០២២ ក្រោមអធិបតីភាពឯកឧត្តម ផៃ ប៊ុនឈឿន រដ្ឋលេខាធិការប្រចាំការ ក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្ទឹងត្រែង និងមានអញ្ជើញចូលរួមជាគណៈអធិបតីដោយ ឯកឧត្តម អនុរដ្ឋលេខាធិការ ក្រសួងមហាផ្ទៃ ឯកឧត្តម អនុរដ្ឋលេខាធិការក្រសួងសុខាភិបាល ឯកឧត្តមនាយឧត្តមសេនីយ៍អគ្គស្នងការរង ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង។

មានវត្តមានអញ្ជើញចូលរួមក្នុងពិធីបើកសន្និបាតនេះ រួមមាន  លោកជំទាវសមាជិកក្រុមប្រឹក្សាខេត្ត  លោកជំទាវអភិបាលរងនៃគណៈអភិបាលខេត្ត អភិបាលក្រុង ស្រុក កងម្លាំងប្រដាប់អាវុធគ្រប់ប្រភេទ ប្រធានមន្ទីរ-អង្គភាពជុំវិញខេត្ត ក្រុមប្រឹក្សាក្រុង ស្រុក នាយកទីចាត់ការ អង្គភាពចំណុះសាលាខេត្ត និងការិយាល័យប្រជាពលរដ្ឋ មេឃុំ ចៅសង្កាត់ នាយប៉ុស្តិ៍នគរបាលរដ្ឋបាលឃុំ សង្កាត់ សរុបចំនួន ២៤២នាក់ ពិធីបិទសន្និបាតនេះប្រារព្ធធ្វើនៅសាលប្រជុំធំសាលាខេត្ត។

ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង បានឡើងរបាយការណ៍សង្ខេបអំពីលទ្ធផលនៃសន្និបាតបូកសរុបលទ្ធផលការងារឆ្នាំ២០២១ និងទិសដៅការងារឆ្នាំ២០២២  រួចមក ឯកឧត្តម ផៃ ប៊ុនឈឿន បានផ្តល់នូវគោលការណ៍ណែនាំជាគន្លឹះ សំខាន់ៗមួយចំនួន ជូនដល់អង្គសន្និបាត ។

ដោយក្នុងនោះ ឯកឧត្ដម ផៃ ប៊ុនឈឿន បានមានប្រសាសន៍បញ្ចាក់ថា៖ ការពង្រឹងសន្តិភាព ស្ថិរភាពនយោបាយ និងសន្តិសុខ សណ្តាប់ធ្នាប់សាធារណៈជាពិសេសត្រូវបង្កើនកិច្ចសហការក្នុងចំណោមកងកម្លាំងមានសមត្ថកិច្ច អាជ្ញាធរ និងបំផុសឲ្យមានការចូលរួមពីប្រជាពលរដ្ឋក្នុងការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ដើម្បីបង្ការ ទប់ស្កាត់ បង្រ្កាបសកម្មភាពលួច ឆក់ ប្លន់ ល្បែងស៊ីសងខុសច្បាប់ ក្រុមក្មេងទំនើងគ្រប់មូលដ្ឋាន ទូទាំងខេត្ត។

ការអនុវត្តកំណែទម្រង់វិមជ្ឈការ និងវិសហមជ្ឈការបន្តពង្រឹងការគ្រប់គ្រង ចាត់ចែង និងអនុវត្តមុខងារដែលបាន ផ្ទេររួចហើយពីថ្នាក់ជាតិប្រកបដោយភាពម្ចាស់ការ និងស្មារតីទទួលខុសត្រូវខ្ពស់ ព្រមទាំងមានភាពច្នៃប្រឌិត ដើម្បីធានាអនុវត្តឲ្យសម្រេចបាននូវមុខងារទាំងនេះស្របតាមស្តង់ដាអប្បរមានៃការផ្តល់សេវា និងគោលនយោបាយទៅតាមវិស័យនីមួយៗ។

ឯកឧត្ដម បន្តថា៖ ការគ្រប់គ្រង ធនធានធម្មជាតិ និងការដោះស្រាយវិទាទដីធ្លីការងារគ្រប់គ្រងធនធានធម្មជាតិ ព្រៃឈើ និងការដោះស្រាយវិវាទដីធ្លី គឺជាកិច្ចការដែលមានការពាក់ព័ន្ធតួនាទី និងការទទួលខុសត្រូវរបស់ក្រសួង ស្ថាប័ននៅក្នុងការតាក់តែងក្របខណ្ឌគោលនយោបាយ ក្របខណ្ឌច្បាប់ ។

ការគ្រប់គ្រង ការពារសន្តិសុខ និងការអភិវឌ្ឍតំបន់ព្រំដែន បន្តពង្រឹង ពង្រីកទំនាក់ទំនងកិច្ចសហប្រតិបត្តិការល្អជាមួយអាជ្ញាធរ និងកងកម្លាំង មានសមត្ថកិច្ចពាក់ព័ន្ធនៃប្រទេសជិតខាង ។

ការអភិវឌ្ឍសេដ្ឋកិច្ច សង្គម យកចិត្តទុកដាក់គាំទ្រ និងបង្កលក្ខណៈ ងាយស្រួលដល់សកម្មភាពវិនិយោគកសិផល អាជីវកម្មនានាទូទាំងខេត្ត ជាពិសេសផ្តល់ការគាំទ្រ និងភាពអនុគ្រោះសម្រាប់ការអភិវឌ្ឍវិស័យកសិកម្ម និងកសិឧស្សាហកម្មដែលជាវិស័យអាទិភាពចម្បងរបស់ខេត្ត ។

ឯកឧត្ដមបន្ថែមថា ការរៀបចំប្រព័ន្ធផែនការ  និងការពង្រឹងប្រព័ន្ធគណនេយ្យភាពសង្គមរដ្ឋបាលខេត្តស្ទឹងត្រែង ត្រូវខិតខំបន្តយកចិត្តទុកដាក់ក្នុងការអនុវត្តនូវប្រព័ន្ធកសាងផែនការអភិវឌ្ឍរយៈពេល៥ឆ្នាំដែលបានរៀបចំ និងដាក់ឲ្យអនុវត្តសម្រាប់ប្រភេទរដ្ឋបាលនីមួយៗ ដែលមានលក្ខណៈ បើកចំហរ មានតម្លាភាព មានការពិគ្រោះយោបល់ មានការចូលរួមពីគ្រប់ភាគីពាក់ព័ន្ធ និងស្របទៅតាមចរិត លក្ខណៈរបស់រដ្ឋបាលនីមួយៗដើម្បីធានាដល់ការប្រើប្រាស់ ធនធាននានាឆ្លើយតបទៅនឹងតម្រូវការជា អាទិភាពរបស់ប្រជាពលរដ្ឋនៅតាមមូលដ្ឋាន ប្រកបដោយ ប្រសិទ្ធភាព គណនេយ្យភាព បរិយាប័ន្ន និងសមធម៌។

ការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋានពង្រឹងការផ្តល់សេវាតាមអង្គភាពច្រកចេញចូលតែមួយនៅសាលាខេត្ត ដើម្បីបង្កលក្ខណៈងាយស្រួលជូនប្រជាពលរដ្ឋមកទទួលសេវានៅកន្លែងតែមួយ ព្រមទាំង ពិនិត្យ តាមដាន និងគាំទ្រដល់ដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋនៅរដ្ឋបាលក្រុង ស្រុក ដើម្បីធានាថាការផ្តល់សេវារដ្ឋបាលទាំងនេះ។

ជាចុងក្រោយឯកឧត្តម ផៃ ប៊ុនឈឿន បានក្រើនរំលឹកការពង្រឹងការអនុវត្តវិធានការនានាដើម្បីប្រយុទ្ធប្រឆាំងទប់ស្កាត់នឹងជំងឺកូវីដ-១៩  និងការពង្រឹងរបៀបរបបការងារទំនាក់ទំនងការងារ សាមគ្គីភាព ឯកភាពផ្ទៃក្នុងឲ្យបានល្អ ក្នុងនោះប្រធានក្រុមប្រឹក្សា និងអភិបាលខេត្ត ក្រុង ស្រុក ត្រូវធ្វើជាស្នូលក្នុងការពង្រឹងរបៀបរបបការងារផ្ទៃក្នុង ក្រុមប្រឹក្សា និង ណៈអភិបាលរបស់ខ្លួនស្របតាមច្បាប់ និងលិខិតបទដ្ឋាននានាជាធរមាន៕ អត្ថបទ+រូបថតៈ តាកោះខ្មែរ