កំពង់ឆ្នាំង ៖ ស្ត្រីម្នាក់ហាក់មានភាពចម្លែក ដូចមានបារមីអ្វីម្យ៉ាងសណ្ធិត នៅរាល់ថ្ងៃសិល្ប៍ ខែពេញបូណ៌មីតែងតែដើរចូលព្រៃបាត់ចេញពីផ្ទះម្តងៗមានរយៈពេលរាប់ខែទើបត្រឡប់មកវិញ តែបាត់លើចុងក្រោយនេះ ពេលសាច់ញាតិនិងអាជ្ញធរមូលដ្ឋានតាមរកឃើញម្នាក់ៗស្លត់ចិត្ត។
លោក ហម ប៊ុនឈឿន អាយុ៤១ឆ្នាំ ត្រូវជាប្ដីរបស់ស្ត្រីខាងលើ បានប្រាប់អ្នកសារព័ត៌មានកាលពីថ្ងៃទី១៧ ខែមិនា ឆ្នាំ២០២៥ថា ប្រពន្ធគាត់ធ្លាប់បាត់ខ្លួនជាច្រើនលើកណាស់មកហើយ ដោយសារតែមានបារមីគ្រូកាន់ ពេលបាត់ខ្លួនម្ដងៗ មានរយៈពេល១ខែ ឬ២ខែ ទើបឃើញត្រឡប់មកវិញ។ ប៉ុន្តែការបាត់លើកនេះ ទោះបីអាជ្ញាធរ និងប្រជាពលរដ្ឋ ជួយរុករកជាច្រើនលើកយ៉ាងណាក្តី នៅតែរកមិនឃើញ។ បើតាមលោកប៊ុនឈឿន ការបាត់ខ្លួនរបស់ប្រពន្ធគាត់ ភាគច្រើន នៅថ្ងៃសីល ឬថ្ងៃពេញបូណ៌មី ម្ល៉ោះហើយ គាត់តែងតែចាប់ប្រពន្ធគាត់ ដាក់ច្រវ៉ាក់ជើងរៀងរាល់ថ្ងៃសីល និងខែពេញបូណ៌មី ប៉ុន្តែការបាត់ខ្លួនរបស់ប្រពន្ធលើកចុងក្រោយនេះ ហាក់បានបាត់ជារៀងរហូត គ្មានថ្ងៃវិលត្រឡប់មកវិញឡើយ។
ជុំវិញរឿងនេះ លោក ប៊ុត សប្បាយ មេឃុំពោធិ៍ បានប្រាប់ឲ្យដឹងថា ដោយមិនអស់ចិត្ត នឹងការបាត់ខ្លួនស្ត្រីខាងលើ ដែលតាមរកមិនឃើញសោះ ទើបនៅថ្ងៃទី១៧ ខែមីនា ឆ្នាំ២០២៥ លោកបានដឹកនាំកម្លាំងប្រជាការពារ ប្រជាពលរដ្ឋ រុករកនៅចំណុចជើងភ្នំកង្រី ជាថ្មីម្ដងទៀត ក៏បានប្រទះឃើញ ប៉ុន្តែស្ត្រីដែលបាត់ខ្លួនបានស្លាប់បាត់ទៅហើយ នៅបន្សល់ត្រឹមសាកស.ព។
លោកមេឃុំ បានប្រាប់ឲ្យដឹងបន្ថែមថា ស.ពស្ត្រីរងគ្រោះ ត្រូវបានរកឃើញនៅក្រោមដើមឈើ ដែលស.ពមានសភាពសល់តែគ្រោងឆ្អឹង ដោយត្រូវភ្លើងឆេះបន្ថែម ដែលតាមការសន្និដ្ឋានរបស់លោក ស្ត្រីរងគ្រោះបានដេកស្លា.ប់ បន្ទាប់ពីហើមរលួយ ហើយទ្រមទៅវិញ ហើយក៏ត្រូវភ្លើងឆេះព្រៃ ឆេះស.ពបន្ថែម ទើបនៅសល់តែគ្រោងឆ្អឹង ។ បើតាមលោកមេឃុំ សមត្ថកិច្ចនគរបាលស្រុកកំពង់លែង ក៏បានចុះពិនិត្យធ្វើកោសល្យវិច័យ និងសន្និដ្ឋានថា ស្ត្រីរងគ្រោះបានស្លា.ប់ ដោយខ្លួនឯង ហើយបានប្រគល់ស.ពទៅក្រុមគ្រួសារធ្វើបុណ្យតាមប្រពៃណី ។
សូមមញ្ចាក់ថា ស្ត្រីរងគ្រោះមានឈ្មោះ ឯក ឡូត អាយុ៤៣ឆ្នាំ មានប្តី និងមានកូន ៤នាក់ មានទីលំនៅឃុំពោធិ៍ ឃុំពោធិ៍ ស្រុកកំពង់លែង ខេត្តកំពង់ឆ្នាំង បានបាត់ខ្លួនកាលពីថ្ងៃទី៥ ខែធ្នូ ឆ្នាំ២០២៥។ ចាប់តាំងពីបាត់ខ្លួន ប្រជាពលរដ្ឋ និងប្រជាការពារ ដឹកនាំដោយអាជ្ញាធរភូមិ-ឃុំ បានដាក់កម្លាំងរុករកជាច្រើនលើកច្រើនសារ ជាពិសេសរកនៅចំណុចភ្នំសំរង ដោយបានប្រើកម្លាំងមនុស្សរាប់សិបនាក់ ក៏តាមរកមិនឃើញ។ ប៉ុន្តែក្រោយពីអាជ្ញាមូលដ្ឋាន សាច់ញាតិ និងប្រជាការពារ សហការគ្នាខិតខំតាមរក ទើបនៅព្រឹកថ្ងៃទី១៧ ខែមីនា ឆ្នាំ២០២៥ បានប្រទៈឃើញស.ពស្ត្រីរងគ្រោះ នៅចំណុចច្រកបាក់ដាវ ជើងភ្នំនាងកង្រី ដែលមានចម្ងាយប្រមាណជាង៣គីឡូម៉ែត្រពីភ្នំសំរង ក្នុងឃុំពោធិ៍ ដែលជាកន្លែងស្ត្រីរងគ្រោះបានបាត់ខ្លួននៅទីនោះ។ ស.ពស្ត្រីរងគ្រោះ ត្រូវបានភ្លើងឆេះខ្លោច សល់តែគ្រោងឆ្អឹង៕
