ខេត្តបន្ទាយមានជ័យ ៖ យ៉ាងហោចណាស់មានមនុស្សចំនួន៦នាក់ (ស្រីចំនួន៣នាក់) បានរងរបួសធ្ងន់ស្រាល ដោយសារ សត្វក្របីឡើង.កមួយក្បាល រត់ដេញវ័ធ កាលពីព្រឹកថ្ងៃទី១២ ខែមិថុនា ឆ្នាំ២០២៣ នៅភូមិផ្សារកណ្ដាល ក្រុងប៉ោយប៉ែត ។
ជនរងគ្រោះ ប្រុសស្រីចំនួន២នាក់ បានរងរបួសធ្ងន់ ដោយសារក្របីវ័ធ រួមមាន ៖ ទី១-ឈ្មោះ ហង្ស ខៀវ ភេទប្រុស អាយុ៤៨ឆ្នាំ នៅភូមិគីឡូត៌ម៉ែត្រ៤ សង្កាត់ផ្សារកណ្ដាល ក្រុងប៉ោយប៉ែត។ ជនរងគ្រោះ ទី២-ឈ្មោះ សុវណ្ណ ស្រីលាក់ ភេទស្រី អាយុ៣៧ឆ្នាំ មុខរបរលក់បាយ មានស្រុកកំណើតនៅខេត្តបាត់ដំបង ។ ក្នុងនោះមានម៉ូតូមួយចំនួនក៏ត្រូវក្របីមួយក្បាលនេះ វ័ធបណ្ដាលឲ្យរងការខូចខាត ផងដែរ ។ ជនរងគ្រោះ ត្រូវដឹកបញ្ជូនទៅព្យាបាល នៅមន្ទីពេទ្យបង្អែក ។
បើតាមសេចក្ដីរាយការណ៍ បានអោយដឹងថា ក្របីឡើងកមួយក្បាល បានបោលចេញពីភូមិផ្សារកណ្ដាល ក្រុងប៉ោយប៉ែត ដោយបោល តាមបណ្ដោយផ្លូវជាតិលេខ៥ មកចូលក្នុងផ្សារ ហើយបានបោលវ័ធ ទៅលើជនរងគ្រោះ កំពុងតែជិះម៉ូតូ បណ្ដាលឲ្យរងរបួសតែម្ដង ។
ប្រភពបានបន្តថា ក្រោយពីវ័ធទៅលើជនរងគ្រោះ ក្របីឡើងកមួយក្បាលនោះ បានព្យាយាមបោលដេញវ័ធអ្នកស្រុក និងអ្នកធ្វើដំណើរតាមផ្លូវមួយចំនួន តាមផ្លូវបេតុង ក្នុងក្រុងប៉ោយប៉ែត បង្កការភ្ញាក់ផ្អើលដល់សមត្ថកិច្ច និងពលរដ្ឋផងដែរ ។
ទោះយ៉ាងណា ក្របីឡើងកមួយក្បាលនោះ ត្រូវសមត្ថកិច្ច និងពលរដ្ឋនាំគ្នាដេញតាមព័ទ្ធចាប់ យកមករក្សាទុក ដើម្បីកុំឲ្យដេញវ័ធមនុស្ស បន្តទៀត។
លោកអធិការក្រុងប៉ោយប៉ែត ក៏បានប្រាប់ឲ្យដឹងដែរថា ក្របីមួយក្បាលលើនោះ ត្រូវបានកម្លាំងលោកព័ទ្ធចាប់បានហើយ ដោយប្រើពេលអស់២ម៉ោង និងកំពុងស្វែងរកម្ចាស់ក្របី ឲ្យចូលខ្លួនមកដោះស្រាយ ជាមួយជនរងគ្រោះ និងការខូចខាតទ្រព្យសម្បត្តិ អ្នកដទៃ ៕
